Swine flu vei an pung zel

Swine flu, H1N1 hri leng vangin state hrang hrangah thi an punbelh zel a, he hri leng vang hian state pathum- Rajasthan, Gujarat leh Uttar Pradesh-ah mi 300 an thi tawh a, hri vei pawh hmuh­chhuah belh zel an ni.

ASSOCHAM chuan swine flu leng vang hian Rajasthan leh Maharastra-in tourism leh industries sector aṭanga an sum hmuh tur cheng vaibelchhe 5500 vel an hloh thei dawn niin a sawi. Heng state pahnihte hian November aṭanga March thla thleng hi khualzin lut an ngah hunlai a ni a, mahse hri leng hian khualzin lut turte hi a nghawng rin a ni.

Rajasthan-ah chuan swine flu leng vangin mi 11 an thih belh leh a, heng mite nen hian he hri vanga thi hi 153 an tling tawh a ni. Rajasthan-a district 33-ah chuan swine flu hi hmuh a ni tawh a, mi 2167 te'n he hri hi an vei tih hmuhchhuah a ni bawk.

Gujarat-ah pawh swine flu vanga hian mi 8 an thih belh a, swine flu vanga thi hi 144 an tling tawh a ni.

Lucknow-ah hri vei mi 7 hmuh belh a ni a, heng mite nen Uttar Pradesh-ah hian swine flu vei hi mi 69 an awm tawh bawk. Uttar Pradesh Chief Minister Akhilesh Yadav chuan Pathian­ni khan an state-a swine flu leng mek chungchang thlirin, doctor leh health department staff-te chu inthlahdah lo turin a chah a, staff inthlahdah an awm chuan an ngaidam mai dawn lo tih a sawi.