Kerala : Wayanad-a leimin vangin mi 66 an thi; Rahul Gandhi-a'n LS-ah chhiatna thleng a sawi chhuak

Kerala-a ruah nasa taka a sur avangin nimin khan Wayanad district-a tlangramah leimin nasa tak a thleng a, chenna in eng emaw zat a hnawl. Chhiatna thleng vang hian mi 66 an thi a, chin hriat lohin mi dang tam tak an awm bawk.

Leimin vang hian Mundakkai, Chooralmala, Attamala, leh Noolpuzha khuate chu tlawhpawh theih lohin an awm mek tih thuneitute chuan an sawi.

Wayanad district collector Meghasree DR chuan State Disaster Response Force (SDRF) bakah NDRF team leh army unit-ten leimin thlenna hmunah hian chhanchhuah hna an thawk mek tih a sawi. Tualchhung miten an pui bawk a ni. Hliam tuar mi 70 te chu damdawi-in hrang hrangah dah an ni tawh bawk.

Congress party hruaitu leh Lok Sabha-a leader of opposition, Rahul Gandhi chuan nimina Lok Sabha rorel inkhawm Zero Hour-ah Wayanad-a chhiatna rapthlak tak thleng chungchang hi sawi chhuakin, sorkar laipui chu harsatna tawkte chhanchhuah leh chhawmdawl hna thawhnaah theihtawp chhuah turin a ngen. Wayanad hi Rahul Gandhi-a Lok Sabha bial hlui niin, kumin inthlanpuiah pawh khan thlan tlin leh a ni a, mahse Raebarelli bialah nen a tlin kawp vangin Wayanad bial zawk hi a chhuahsan a ni.

Parliamentary affairs minister Kiren Rijiju chuan chhiatna thleng chungchangah prime minsiter Narendra Modi chuan Kerala chief minister Pinarayi Vijayan a be nghal tih sawiin, Kerala mi, minister of state pawh a tirh nghal thu a sawi. Prime Minister hian leimin avanga thi chhungte hnenah zangnadawmna Rs nuai 2 ṭheuh leh, hliam tuarte hnenah Rs 50,000 ṭheuh pek an ni dawn tih a puang tawh bawk.

Kerala-a hian ruah a sur nasa hle a, Thawhṭanni khan ruahtui mm 372 zet a tla hman. Cheruvancherry-ah mm 233, Kollengode-ah mm 233, Annakayam-ah mm 227 te a tla bawk. India Meteorological Deparmtent (IMD) chuan nimin atan khan district pasarih ah orange alert leh district pahnihah yellow alert a ti chhuak.