'One Rank One Pension' chungchangah SC-in sorkar laipui a khak

Supreme Court chuan sorkar laipui chu sipai, captain chinte pension pek dan tur, One Rank One Pension (OROP) scheme chungchanga thutlukna a siam har lutuk avangin nimin khan a khak a, Rs nuai 2 chawi turin a ti bawk.

Justice Sanjiv Khanna leh R Mahadevan awmna bench chuan he scheme hnuaia sipai officer-te pension pek dan chungchang tifel turin sorkar laipui chu November 14 thleng hun a pe leh.

Thutlukna mumal siam loa a tihkhawtlai rei avanga sorkar laipui Rs nuai 2 an chawitir chu Army welfare fund atan pek a ni dawn tih sawiin, November 14-a sorkarin thutlukna a siam fel loh chuan regular captain pension chu 10% a pek belh turin a ti ang, tiin a sawi bawk. November 25-ah hearing hi neih chhunzawm a ni leh dawn a ni.

Court-a sorkar lam aiawha inlan, Additional Solicitor General Aishwarya Bhatti chuan Armed Forces Tribunal (AFT) Kochi bench-in siamṭhat ngai nia a sawi point paruk a sawite chu sorkar lamin a la tifel lo niin a sawi. Mahse court chuan hun an la rei tawh lutuk tih sawiin, 'Kum eng zat nge hetiang hian a khawtlai zel dawn? Kum 2021 aṭanga sawi ṭan tawh ni chungin tun thlengin thutlukna siam a la ni lo," a ti.