UP sorkarin 'Love Jihad' law-ah dam chhung tan theihna siam rawt

Uttar Pradesh chief minister Yogi Adityanath kaihhruai BJP sorkar chuan Assembly-ah Uttar Pradesh Prohibition of Unlawful Conversion of Religion (Amendment) Bill, 2024 pharhin, 'love jihad' case-ah dam chhung tura hremna siam a rawt.

'Love jihad' tih hi Muslim mipaten an sakhua tihngheh leh zauh zelna hmanrua atana Muslim ni lo hmeichhiate nupui atan nei a, Islam sakhuaa an inleh tir ṭhin an sawina atan an hmang ṭhin.

BJP chuan dan siamṭhat rawtna hi an thlawp hle a, BJP hruaitu Mohsin Raza chuan he dan hi siamṭhat a nih chuan 'love jihad' hmanga dan kalha sakhaw inlehna thleng ṭhin do letna kawngah a ṭangkai dawn hle niin a sawi. Mipa tam takin an nihna thupin lem an chang a, nupuia an neih hnuah an nupuite chu an sakhua zawm turin a inleh luihtir ṭhin a ni, a ti.

Hetih lai hian eptu party, Samajwadi Party chuan he thil hi daidanna siam tumna, khawtlanga inhmelmakna thlen thei tur a ni tih an sawi. SP hruaitu Fakhrul Hasan Chand chuan, 'UP hian love jihad chungchangah hremna tur dan a nei sa vek tawh a ni tiin BJP hian sakhaw pakhat huat bik a neih avanga he dan siamṭhat hi tum niin an puh. Hemi aia vei leh ngaihtuah ngai zawk, hna thawh nei lo pung zel leh exam paper leak chungchangte chu a ngaihven leh si lo niin a sawi.