Two-wheeler khalhtu leh an mi phurh inbiak khap

Kerala Motor Vehicle Department chuan road safety atana a hmalakna pakhatah, state chhunga two-wheeler khalhtute chu kawnga an tlan laiin an mi phurhte nena an inbiak a khap. Hei hi chetsualna thleng thei venna atana an tih a ni.

Department thuchhuah he khapna hian two-wheeler zawng zawng, scooter leh bike a huam vek tih sawiin, kawngpui eng hmunah pawh hman vek tur a ni tih a sawi. He thupek zawm lo chu pawisa chawitir an ni ang a, dan an bawhchhiat nawn leh chuan hremna na zawk pek an ni dawn tih a tarlang.

He thupek thar an siamna chhan chu bike/scooter khalhtute rilru la peng tur tihtlemna atan leh, accident thleng thei laka invenna tur a ni tih an sawi. Kawngpuia tlan laia inbiak chuan bike/scooter khalhtu rilru a pawtpeng thei a, chetsualna thlen palh theihna a tam niin an sawi.

MVD chuan state chhunga regional transport office (RTO) office zawng zawngah hriattirna pein, traffic police-te chu he dan thar hi khauh taka kengkawh tura tih an ni.