PM Modi-a'n sakhaw tê zawkte thlavang a hauh

Tun hnaia Delhi-a Kristiante biak-in vawi eng maw zat suasam a nih hnuah Prime Minister Narendra Modi chu Thawhlehni khan a ṭawngchhuak ve ta a, sakhaw tê zawkte humhalh an nih tur thu leh sorkarin sakhaw hrang hrangte inkara inhuatna a thlen a remtih loh thu a sawi.

New Delhi-a Catholic kohhran hruaitu Kuriakose Elias Chavara leh Mother Euphrasia te sainthood atana lakluhna inkhawmah thu sawiin Modi chuan sakhaw hrang hrang zuitute chunga tharum thawhna thleng ṭhin chu a dem thu a sawi bawk.

"Ka kaihhruai sorkar chuan mitinin an duhthlan ang zela an sakhaw zawm duh an zawm theih leh sakhaw zalenna a awm theih nan theihtawp chhuahin a bei zel ang," a ti.

Prime Minister Modi chuan, "Eng sakhua pawh a lian zawk emaw a tê zawk pawh ni se sakhaw dangte huatna chawk tho thei eng thil mah an thlen kan phalsak dawn lo a, ka kaihhruai sorkar chu sakhaw zawng zawngte intluk­tlanna ngaipawimawhtu a ni," a ti.

"Sakhaw tê zawkte chunga tharum thawhna a thlen kan remti lo a, hetianga tharum thawhna thleng hi ka dem tak zet a ni. Ka kaihhruai sorkar chuan theihtawp chhuahin a do zel ang," tiin a sawi bawk.

Modi chuan sakhaw hrang hrang vuantute chu midang sakhua zahsak ṭheuh turin a ngen bawk a, sakhaw dangte chunga dawhtheihna chu India ram kalphung tur, India danpuia chuang a ni tih a sawi.

India ram hmasawnna atana a hmachhawpah inremna chu thil pawimawh tak a ni, tiin a sawi bawk.

"Inremna leh lungrualna chuan min tichak a, inṭhendarhna chuan mi tichau a ni. Mipuite inlung­rualna atana mawhphurhna lian tak kan hmachhawn mekah hian India khua leh tui zawngte zawngte chu min thawhpui turin ka sawm a che u," tiin PM Modi chuan a sawi.

Catholic kohhhran hruaitute pawhin Modi-a thusawi chu lawm­awm an tih thu an sawi bawk.

Catholic Archdiocese Church hotu Fr. Savarimuthu Sankar chuan Prime Minister Modi a ṭawng­­chhuah tak avangin mi zawng zawng an lawm tih a sawi a, a thusawite chu a taka a thlen ngei a beisei thu a sawi bawk.

Kristiante hmun pawimawh beihna tun hnaia thlengah February 13 khan South Delhi-a Holy Child Auxilium school chu suasam a ni a, he thil thleng hi thla hnih chhunga Kristiante biak-in leh school suasam vawi ruk-na a ni.