Swine flu vei mi 9,311 tling tawh
Ramchhunga swine flu, H1N1 a leng mek a, ni 45 chhungin he hri leng vanga thi hi mi 624 an tling a, mi 9,311 in an vei tih finfiah a ni tawh bawk.
Gujarat, Rajasthan, Telangana, Maharashtra leh Madhya Pradesh-te chu a tuar nasa state an ni a, heng state-a hian swine flu vang hian mi 150, 176, 46, 58 leh 81 an thi tawh a ni.
Uttar Pradesh-ah chuan ni 4 chhungin mi 139 in swine flu hi an thihpui a, a vei thar mi 100 hmuhchhuah an ni bawk. Aligarh Muslim University chuan campus chhungah swine flu vanga zirlai pakhat thi a awm avangin class pawh a suspend rih a ni.
Gujarat-ah mi 150 an thi tawh a, 1,600 te'n an vei tih finfiah a ni bawk. Rajasthan-ah swine flu vanga thi 170 chuang awmin mi 2,500 velin an vei bawk. Health ministry official-te chuan hri len nasatna, Rajasthan leh Gujarat state ah hian central team tirh an ni, an ti.
Union Health Minister JP Nadda chuan swine flu leng mek chungchang hi ngaihtuahin nimin khan high level meeting a ko a, health secretary, additional secretary-te leh drug controller-te nen meeting an nei.
Swine flu damdawi, Tamiflu chu Schedule X-ah dah a ni a, hemi awmzia chu ramchhunga damdawi siamtu, license nei 10,000 te'n he damdawi hi an supply thei ang.