Bihar BJP MLA-te'n Jitan Ram Manjhi an thlawp dawn

Vawiin hian Bihar Chief Minister Jitan Ram Manjhi chu House-ah fiah a ni dawn.

Bihar-a rorellai Janata Dal United chuan Chief Minister atan hian Nitish Kumar dah let leh an duh avangin Manjhi hi bang turin an nawr a, mahse Manjhi hi a ban duh loh avangin a tel loa party legislature meeting an neihah Kumar chu hruaitu atan an lo thlang a, Manjhi hi party aṭangin an hnawt­chhuak tawh bawk a ni.

Kumar hian amah thlawptu MLA rualte hruaiin Delhi-ah President Pranab Mukherjee pawh a lo hmu tawh a, sorkar siam turin member a ngah tawk tih a hrilh.

Manjhi hian JDU MLA zingah thlawptu 12 a nei a, hetihlai hian an party MLA 98 chuan Kumar hi an thlawp thung.

Eptu pawl, BJP MLA zingah Manjhi thlawp duh leh duh loh an awm a, hei vang hian thutlukna an siam mai thei lo a, mahse nimin khan CM fiah hunah thlawp an rel a, an thurel hi central lama an party hruaitute an hriattir leh ang.

BJP MLA-te'n an thlawp chuan Manjhi hian member 243 awmna Assembly-ah hian JDU MLA 12 leh independent MLA 3 nen thlawptu 102 a nei thei dawn a ni. Hetihlai hian Nitish Kumar hian an party MLA bakah member dang nen thlawptu 128 a nei thung.

Assembly Speaker, Uday Narayan Chaudhary chuan nimin khan JDU hi eptu party lian ber nihna status a pe a, hei hi BJP chuan na takin a sawisel nghal.

Speaker chuan eptu hruaitu, BJP MLA Nand Kishore Yadav chu thlakin a aiah JDU hruaitu Vijay Chaudhary a dah nghal bawk. Speaker chuan, "Assembly Secretariat chuan member-te tam dan ang zelin kan ruat ṭhin a, JDU hian eptu pawl lian ber nih a dil a, BJP aia member a ngah avangin an dilna hi hnawlsak theih an ni lo," a ti. Mahse BJP lam an lungawi lo a, nimin khan Assembly building kawt­ah Speaker thu­tlukna siam danah an lungawi lohna an lantir. BJP hruai­tu Nand Kishore Yadav chuan, "Tun ṭum hi ramchhungah party pakhat, eptu lam leh rorellai lamah an ṭhut ṭum khatna a ni dawn a ni," a ti. BJP chuan CM fiah a nih hunah Manjhi thlawp tum mah se, a kaihhruai sorkarah erawh tel an tum lo tih a sawi bawk.