PM hming inziahna suit lilam a ni

Kumin Republic Day lawmnaah Prime Minister Narendra Modi-a suit hak sawizui hlawh tak chu Nilaini aṭang khan lilam a ni a, ni thum chhung hun hawn a ni ang.

PM suit hi a hming Narendra Damodardas Modi tih hmangin ṭial a ni, cheng nuai 10 man nia sawi niin, sawizui a hlawh hle.

'Global Frieds Group' inti te'n Surat-ah suit hi an lilam a, chhangtu pawh an pung zel. Suit lilam hi cheng nuai 11-a ṭan a ni. Lilam ṭan nia chhang sang ber chu textile lama sumdawng, Rajesh Juneja a ni a, cheng vaibelchhe 1.21 in a chhang a, mahse nimin khan Kalam Kant Sharma chuan lanin, cheng vaibelchhe 1.41 in a chhang ve leh a ni. Lilam hun hi khar a la ni lo a, vawiin thlengin chhan theih a ni ang.

Suit lilamna aṭanga sum hmuh hi Clean India Mission kalpuina atan hman a ni ang.

Lilamnaah hian PM suit bakah hian thilpek a dawn dang 455 leh, Gujarat Chief Minister Anandiben Patel thilpek dawn 361 te telh a ni bawk a, heng aṭanga an sum hmuhte hi Clean India Misson bakah hmeichhe naupangte zirna pekna atan hman a ni ang.