Trust vote neih hmain Bihar CM a bang

Bihar Chief Minister Jitan Ram Manjhi chu nimin khan Assembly House-a fiah a nih hma lawkin CM a nihna aṭangin a bang.

Assembly inkhawm ṭan hmain Manjhi hian Governor KN Tripathi hmuin, banna a thehlut. Hemi hnu hian press conference nei zuiin, amah leh amah thlawptu MLA-te'n vau leh tham tuma thlemna an tawh avanga bang a nih thu a sawi a, hei bakah hian Speaker chuan secret ballot hmanga vote lak a remti lo bawk tih a sawi.

Manjhi chuan assembly chu ṭhiat a, inthlan ṭhat buatsaih a rawt nghal bawk.

CM a ban thu an hriat hian JD(U) chuan an lawm nghal a, JD(U) in Chief Minister atana dah a tum, Nitish Kumar chuan, "BJP-in Bihar lak an tumna chu a tlawlh ta a ni," a ti. BJP hian vote lak hunah Manjhi hi thlawp an tum thu an lo sawi tawh a ni.

Bihar-a rorellai, JD(U) hian Nitish Kumar chu Chief Minister-a dah leh an duh avangin Manjhi hi bang turin an nawr a, Ferbuary 7 khan legislature party hruaitu atan Kumar hi an thlang a ni. Mahse Manjhi hi a ban duh loh avangin kar kalta khan an party aṭangin an hnawtchhuak.

Chief Minister hlui, Nitish Kumar hi nikum Lok Sabha inthlana an party an chet chhiat avangin mawhphurhna lain CM a nihna aṭangin a bang a, amah thlak turin Manjhi hi a ruat a ni. Mahse Kumar chuan Manjhi hian an state chu hma a sawnpui lo niin a puh a, an party pawhin kumina assembly inthlan an neih tur chu Nitish Kumar-a kaih­hruaina hnuaiah hma­chhawn an duh bawk.

Kumar hian thlawptu MLA 130 a nei tih sawiin, February 9 khan Governor hnenah CM atana la lut turin a ngen a, mahse central lam thupek angin Governor hian Manjhi hi Assembly-a fiah phawt turin a ti a ni.

CM-in fiahna hma­chhawn ngam loa a ban tak avangin nimina Assembly inkhawma Governor thusawi tur pawh ṭhulh a ni a, chhun dar 12.30 khan Speaker Uday Narayan Choudhary chuan inkhawm a titawp nghal.