Oil Ministry document putru vangin mi panga man an ni

Oil Ministry confidential document putruk chungchangah Ningani khan oil ministry official pahnih, Reliance Industries (RIL)-a thawk pakhat, middleman pahnih man an ni a, nimin khan energy consultant pahnih man an ni leh bawk.

Document putru hi independent consultant leh energy company ṭhenkhatin an nei a, Delhi Police Commissioner BS Bassi chuan document-te chu ru chhuakin a photocopy siam a ni a, hei hi to takin an hralh niin a sawi. Document putru lo leitu, consultant leh energy company ṭhenkhat chu thu zawhfiah mek an ni.

Petroleum Minister Dharmendra Pradhan chuan he thil thleng hi thil pawi tak a ni tiin, ministry-a thawk zinga document lo ti putrute chungah na taka action lak a nih tur thu a sawi.

Minister Pradhan chuan central-a NDA-in sorkarna a chan hnuah ministry venhimna khauh taka kalpui a ni a, hei vang hian document pawimawh rukchhuah hi sorkar hmasa, UPA sorkar hunlaia thleng nia a ngaih thu a sawi.

Congress thupuangtu, Randeep Surjewala chuan document a putruk dan chu chhui chiang turin sorkar a phut a, hei bakah hian document putru vanga lo hlawkpuitu sumdawng liante hming chu tarlang turin a phut bawk.