Kerala : Wayanad leimin vanga thi 166 an tling tawh

Kerala-a Wayanad district-a leimin nasa tak thleng vanga thi chu mi 166 an tling tawh a, leimin tuarte chhanchhuah hna thawh chhunzawm zel a ni. Hliam tuar mi 195 awmin, chin hriat lohin mi 225 vel an la awm mek bawk.

Ruah sur nasa avanga Wayanad-a tlang rama leimin hian thingtlang khaw eng emaw zat a nghawng a, Indian Amry chuan leimin tuartu mi 1,000 dawn chu hmun him lamah an hruai chhuak tawh. Brigadier Arjun Seagan chuah chhanchhuah hna hi NDRF team, Army, state police, forest official leh volunteer mi 500 -600 velin an thawk mek tih a sawi.

NDRF leh Army pui tur hian Naval team leh Air Force helicopter-te pawh tirh an ni bawk a, khuain ziaawm lam a pan deuh hunah leimin vanga tangkhangte chu hmun him lamah helicopter hmanga hruai chhuah an tum tih Brigader chuan a tarlang. Hetih lai hian weather department chuan Wayanad leh distict dang ṭhenkhatah chuan ruah nasa takin a la sur chhunzawm dawn niin a sawi thung.

Ruang hmuh tawh zinga 143 chu postmortem ni tawhin an zinga mi 89 chu tunge an an nih hriatchian a ni tawh a, ruang 32 chu an chhungte hnenah hlan an ni tawh a ni.

Union home minister Amit Shah chuan July 23 khan Kerala sorkar hnenah leimin thleng palh thei reng a ni tih hriattir a ni tawh niin nimin khan Parliament-ah a sawi. Ruah a sur nasa dawn tih sawi lawk a nih hnuah sorkar laipui chuan NDRF team pakua chu Kerala-ah hian a tir nghal tih sawiin, Kerala sorkar chu chhiatna thleng thei chungchangah hma la chak tawk loah a puh. Hemi rual hian Kerala in chhiatna nasa tak a tawh mekah sorkar laipui chu state sorkar leh mipuite tan a ding zel dawn tih sawiin, a theih dan kawng apianga an puih zel tur thu a sawi.

Chief minister Pinarayi Vijayan kaihhruain nimin zing khan cabinet meeting neih a ni a, leiminna hmuna chhanchhuah hna thawh mek chungchangte an sawi ho a, thawktu leh hmanruate thawn belh an rel a ni. Cabinet chuan ruang lak chhuah tawhte chu chhungte hnena hlan hma an nih theihna tur postmortem chak zawka kalpui a nih theih dan turte an sawi ho bawk. CM hian vawiin hian chhiatna thlenna hmun a tlawh dawn a, tlai lamah Wayanad district-a all party meeting a kaihruai bawk ang. He hunah hian chhiat tawk chhungte leh hliam tuarte zangnadawmna pek dan tur leh, leimin avanga an in leh lo chante chhawmdawlna tur chungchangte an sawi ho dawn a ni.