Sonia-i'n budget, census leh national security chungchangah PM Modi kaihhruai sorkar laipui a sawisel
Congress parliamentary party chairperson leh Rajya Sabha MP nilai, Sonia Gandhi chuan prime minister Narendra Modi kaihhruai NDA sorkar term thumnain union budget a pharh tak chu na taka sawiselin, sorkar chuan Lok Sabha inthlan result aṭanga inzir aiin inthiarhranna policy chu a kalpui chhunzawm a, mipuite rilruah hlauhthawnna a tuh a ni, a ti.
Sonia Gandhi chuan BJP kaihhruai NDA sorkar chu census tihkhawtlai zelah a puh bawk a, hetianga census tikhawtlai hian sorkar chu ram mipui awm zat, a bikin scheduled caste leh scheduled tribe awm zat a hre thei dawn lo tih a sawi .'Census hi kum 2021-a neih tur kha ni tawh mah se sorkar chuan tun thlengin kalpui tumna a nei lo. Hei vang hian kan ram mipui zinga vaibelchhe 12 te chuan National Food Security Act of 2013, tuna PM Garib Kalyan Anna Yojana tih tak hnuaia hamṭhatnate chu an dawng thei lo a ni," tiin Congress Parliament Party meeting-ah a sawi.
Sorkar laipuiin sorkar hnathawk, RSS activity-a tel phalsak an nih theihna tura dan a thlak danglam chungchang pawh Congress hruaitu hian a sawichhuak bawk. 'Vanneihthlak takin a hun takah Supreme Court a rawn inrawlh hlauh a ni. RSS-a bureaucrats te tel phalna tura dan an siam danglam ran zia kha kan hre vek awm e," tiin RSS chuan cultural organisation inti mah se, khawvel chuan BJP political leh ideological base a nihzia chu an hre vek a ni, a ti.
Gandhi chuan Manipur tualchhung buaina leh, Jammu and Kashmir-a firfiakte pawikhawihna thleng chhunzawm reng chungchangah Modi kaihhruai sorkar a hlawhchham zia a sawilang bawk. "National security chungchangah thu hriat hrehawm tak kan hre reng a, kar rei vak lo liam ta chhungin Jammu region bikah firfiaka chetna ṭum 11 vel a thleng a, Valley-ah pawh a thleng fo bawk. Security mi leh sa bakah civil mi tam takin nunna an chan a ni. Modi sorkarin J&K boruak a ṭha tawh tia a sawi ṭhin chu heng thil thlengte hian nuihzatburah a chantir zawk a ni," tiin a sawi. Manipur boruakin hma a sawn lo tih pawh sawiin, "PM chu khawvel ram hrang hrangah a zin kual a, mahse ram chhung state pakhata boruak ṭha siam tur erawh chuan a zin duh leh si lo a ni," tiin a sawi.