Sorkarin budget session tur chungchangah all-party meeting a ko Vawiinah budget session tan dawn

Sorkar laipui chuan vawiina budget session neih tur chung­changah nimin khan all-party meeting a ko.

Parliamentary Affairs M Venkaiah Naidu chuan all-party meeting hi koin, budget session-a sawi ho tur, finance, legislation leh thil pawimawh dangte an sawiho.

Budget session neih tur chung­changah hian nimin tlai khan Lok Sabha speaker Sumitra Mahajan pawhin tluanga taka rorelna neih a nih theih nan party hrang hrang hruai­tute meeting a neihpui bawk.

Session neih turah hian sorkar laipui chuan financial, legislative leh non-legislative agenda 44 a siam.

Vawiina session ṭan nan President Pranab Mukherjee chuan Parliament in hnihah thu a sawi ang. Railway budget chu February 26-ah pharh a ni ang a, February 27-ah Economic Survey chungchang sawi hoin, February 28-ah budget pharh a ni ang.

Tun ṭuma budget session-ah hian Lok Sabha-a bill pathum leh Rajya Sabha-a bill pasarih la pass lohte chu sawi ho leh a ni ang.

Lok Sabha-a bill la chinfel lohte hi Goods and Services Tax chungchang, Constitution (122nd Amendment) Bill, 2014 bakah Lok Pal and Lok Ayukta chungchangte a ni a, hei bakah hian Related Law (Amendment) Bill, 2014 leh The Repealing and Amending Bill, 2014 chu pass a nih hnuah Rajya Sabha-a thawn phei a ni nghal ang.

Rajya Sabha-a bill la chinfel loh zingah hian Lok Sabha-in bill a pass tawh pali a tel. Chungte chu- The Companies (Amendment) Bill, 2014, The Public Premises Eviction of Unauthorised Occupants) Amendment Bill, 2014, The Regional Rural Banks (Amendment) Bill, 2014, The Repealing and Amending (Second) Bill, 2014, leh Payments and Settlement Systems(Amendment) Bill, 2014 te an ni.

Bill dangte chu- The Prevention of Corruption (Amendment) Bill,2013 leh The Constitution (Scheduled Casts) Orders (Amendment) Bill, 2014 te an ni.

Bill thar 10 putluh tum a ni bawk a, chung­te chu- National Cooperative Development Corporation, the Warehousing Corporation, Andhra Pradesh reorganisation, arbitration and conciliation, repeal of appropriation acts, registration of births and deaths, whistle blowers protection, Indian Institutes of Management, National Academic Depository leh Identification of Scheduled Castes kaihhnawih thilte a ni.

President Pranab Mukherjee-a'n motion of thanks a sawi chu non-legislative agenda-ah dah a ni a, sawi ho a ni bawk ang.

Budget session thawh khatna hian March 20 thleng a awh ang a, a thawh hnihna hi April 20- May 8 chhungin neih a ni leh ang. A thawh khatnaah hian working day 20 a awm ang a, a thawh hnihnaah working day 13 a awm ang.