Oil Ministry lehkha pawimawh ruchhuaktu hrem lohin chhuak lo ang: HM Singh

Company mi leh sa ṭhenkhatin Petroleum and Natural Gas Ministry lehkha pawimawh an rukchhuah thubuaiah Union Home Minister Rajnath Singh chuan a mawhphurtute chu hrem loha an chhuah loh tur thu a sawi.

Petroleum Ministry lehkha pawimawh ruchhuaktu nia rinhlelh panga te chu Delhi-a Patiala House Court-in ni thum chhung police te kutah a lo dah tawh a, police te chuan pawikhawihtute hi 'Official Secrets Act' hmanga hrem theih an beisei thu court-ah an thlen tawh bawk.

Petroleum Ministry lehkha pawimawh rukchhuah kaihhnawihah hian police te chuan mi 12 an man tawh a, ministry-a official ṭhenkhat leh middleman eng emaw zat chu Delhi Police te'n an enthla mek.

Ministry lehkha pawimawh rukchhuah thubuai hi sorkar enthlak tumna nia sawi a ni bawk a, investigating agency te chuan ministry dang leh sorkar official te pawh an enthla bawk.

Delhi Police te chuan Petroleum Ministry-a hnathawkte chu lehkha pawimawh awlsam taka nei thei an nih avangin a mawhphurhtu an nih an rin thu an sawi.

Petroleum Ministry lehkha pawimawh chu a ruka photocopy siam niin, heng lehkha pawimawhte hi oil company te hnenah man to taka hralh a ni a, Delhi Police crime branch chuan thubuai chhuichian hna a thawk mek a ni.