Bihar CM atan Nitish Kumar lakluh a ni

Janata Dal (United) hruaitu Nitish Kumar chu nimin khan Bihar Chief Minister atan rinawmna thu tiamtira lakluh a ni.

Patna, Raj Bhavan-a Chief Minister lakluh inkhawm hi Governor Keshari Nath Tripathi-a'n a kaihruai a, Assam CM Tarun Gogoi, West Bengal CM Mamata Banerjee, Uttar Pradesh CM Akhilesh Yadav leh Jharkhand chief minister hlui Babu Lal Marandi te pawh an tel.

JD(U) hruaitu Nitish Kumar-a'n MLA thlawptu 130 a neih theih nan Rashtriya Janata Dal (RJD) 24, Congress 5, CPI pakhat leh independent MLA pakhat chuan an thlawp a, hetihlai hian Nitish-a kaihhruai sorkarah an tel tur thu an la tichiang lo.

Bihar PCC president Ashok Choudhary chuan Nitish Kumar-a'n a kaihhruai sorkar fiahna a hmachhawn hunah Congress chuan sorkara an tel leh tel loh tur chung­changah thutlukna an siam tur thu a sawi.

Member 243 awmna Bihar assembly-ah hian JD(U) chuan member 115 a nei a, heng zinga a tam zawkin Nitish Kumar an thlawp bakah RJD, Congress, CPI leh Independent MLA pakhatin an thlawp bawk.

BJP chuan member 88 a nei a, thlawptu independent MLA pathum a nei bawk.