Parliament monsoon session September 14-ah

Parliament monsoon session chu September 14 aṭanga October 1 thleng neih a ni dawn a, house pahnihte chuan Inrinni leh Pathian­niah pawh chawlh an nei lo ang. 

House pahnihah ni khatah darkar li chhung rorel inkhawm neih a ni dawn a, zing leh tlai lamah session neih a ni ang. Session chhung hian rorel inkhawm hi ṭum 18 an nei hman dawn a ni. MP-te chu session neih chhungin an awmna khuaah emaw an constituency-ah emaw  kir phal a ni lo a, hei hi Covid-19 hri leng vanga venthawn thil atan tih a ni.

Ram chhunga hripui lengin zual lam a pan zel avangin session neih tur atan pawh hian invenna leh khuahkhirhnate uluk taka siam a ni. House chhunga air-conditioning unit zawng zawngah ultraviolet irradiation system dah tum a ni a, he hian hri leh a kaihhnawihte a tihhlum thei tura  ngaih a ni. 

House-a chamber-ah hian display screen lian tak (85 inches) pali dah tum a ni a, gallery pali-ah display screen (40 inches) paruk leh audio console dah tum a ni bawk. Rajya Sahba chamber-ah prime minister Narendra Modi, union minister-te leh House leader leh opposition leader-te ṭhutna tur bik siam a ni ang a, prime minister hlui Dr Manmohan Singh leh HD Deve Gowda-te ṭhutna tur bik pawh siam a ni ang. Party hrang hrangte chu an tam dan azirin Rajya Sabha chamber emaw, gallery-ah an ṭhuhna siam a ni dawn a, Lok Sabha chamber-a chuan rorellai party te block khat a, party dang block dangah dah an ni bawk ang. 

Officials Gallery leh Press Gallery-a ṭhu tur pawh social distancing dan zawm anih theihna atan tihtlem a ni a, mi 15 ve ve chauh an ṭhu thei ang. Report hmasa lamah chuan Rajya Sabha session laiin report pasarih leh, Lok Sabha session laiin reporter 15 chin chauh an tel phalsak an ni dawn nia tarlan a lo ni tawh. 

Lok Sabha leh Rajya Sabha TV chuan session hi live-in an tichhuak reng dawn a ni. September-a session neih tum hi kumin March thlaa hripui leng vanga prime miniter Narendra Modi-a'n ram puma lockdown a puan hnua Parliament session neih leh hmasa ber tur a ni. Dan pangngaiah chuan July thla laihawlah Monsoon session hi neih ṭhin a ni a, mahse Covid-19 hri leng vangin sawn hlat a ngai ta a ni.