Parliament Budget session tan a ni

Nimin khan Parliament budget session chu ṭan a ni a, session ṭan ni hian President Pranab Mukherjee chuan Central Hall-ah house joint sitting hmaah thu a sawi.

Budget session hi May 8 thleng neih a ni ang. A thawk khatna hi March 20 thleng neih a ni dawn a, hemi hnu hi chawl lailawkin April 20-ah a thawh hnihna ṭan a ni ang. February 28-ah Railway Budget pharh a ni ang a, ni 27-ah Economic Survey pharh a ni ang. February 28 hi holiday ni mah se special sitting neiin, Finance Minister Arun Jaitley chuan General Budget a pharh ang.

President chuan Parliament rorel tluang taka a kal theihna tura thawk ho turin MP-te a ngen.

Pranab Mukherjee hian darkar khat vel thu sawiin, thla kaw kalta chhunga NDA sorkar hmalakna hrang hrangte a tarlang a, India ram tana hmachhawp an neihte a sawilang bawk.

Sorkar laipui chuan loneitute hmakhua ngaiin hma a la zel dawn a, an ram hmansak an nihah pawh zangnadawmna an phu ang tak pek an nih zel tur thu te President chuan a sawi a, hemirual hian sawi hlawh tak Land Acquisition Bill siam danglam a nih dan chu sut tumna a awm thu erawh engmah sawilan a ni lo.

Ṭhenawm ramte nena inlai­chinna ṭha siam tumin sorkar chuan theihtawp a chhuah mek a, mahse ramri leh mipuite venghim turin a inpeih reng bawk a ni, a ti.

Tun hnaia China President Xi Jinping, Russia President Vladimir Putin leh US President Barack Obama te'n India ram a rawn tlawh chuan heng ramte nena an inlaichinna ṭha zawk a siamsak a ni tih President chuan a sawi bawk.

India ram tihthianghlimna tura faina beihpui thlakna, Swachh Bharat kalpui mek chu a hlawhtling chho hle tih sawiin, President chuan Parliament member-te chu an MPLAD fund 50% chu Swachh Bharat mission atana hmang turin a ngen.

Sorkar laipui chuan hna tam zawk siam turin job market tihlen a tum a, hnathawktute hmakhua ngaiin chawikan a tum bawk a, hnathawktute kaihhnawih dante chu rintlak leh langtlanga kalpui a tum a ni tiin President chuan a sawi.