Anna Hazare-a'n nawrh a huaihawt

Eirukna dotu, social activist Anna Hazare chuan sorkar laipuiin Land Acquisition Bill a siamṭhat dana lungawi lohna lantirin nimin khan Jantar Mantar-ah nawrh a huaihawt.

Hazare chuan Narendra Modi-a kaihhruai sorkarin Land Acquisition Bill a siamṭhat dan chu loneitute ngaihthahna a ni tiin, a siam dang­lamna chu sut turin a phut. A thil phut hi sorkar laipuiin a ngaihsak loh chuan Ramila Ground-ah nasa zawka nawrh huaihawt a tum tih a sawi bawk.

Jantar Mantar-ah hian ni hnih awh nawrh huaihawt a tum a, hemi hnu hian thla thum aṭanga thla li chhung chu ramchhung hmun hrang hrangah sorkar laipuiin loneitute a ngaihthah hriat­tirin 'padyatra' neih a tum tih a sawi.

Hazare chuan, "Sorkar­in ordinance a siam hi a hnukkir lo a nih chuan mipuiten nawrh an huai­hawt chhunzawm tawh dawn a ni. Activist-te chuan loneitute dan siam­ṭhat hi an tana a ṭhat loh dante an hriattir ang a, thla li hnu velah chuan Ramlila Maidan-ah hian ram­chhung hmun hrang hranga loneitute an pungkhawm mai dawn a ni," a ti.

Delhi-a rorellai, Aam Aadmi Party (AAP) hruai­tu Kumar Vishwas chuan Land Ordinance Bill chung­changah nimin khan Anna Hazare hi a hmu a, AAP hian nawrh huaihawt hi an zawm dawn leh dawn loh an la sawichiang lo.

Congress party pawhin sorkar laipui thiltih dan hi sawiselin, Land Acquisition ordinance a siam dawn hian party dangte a rawn lo a, he bill a siam danglam chhan hi mi hausa leh sumdawng liante tihlawm a tum vang niin a sawi. Congress hruai­tu Mallikarjun Kharge chuan he bill siam danglam a nih danah an lungawi loh thu hi Parliament-ah pawh sawichhuah an tum tih a sawi.