Delhi CM leh deputy CM-te'n an bungalow an luah duh lo

Delhi Chief Minister Arvind Kejriwal leh Deputy Chief Minister Manish Sisodia-te chuan an bungalow tura ruat chu an luah duh lo a, khawpui laili-a, Lutyens' zone-ah an awmna tur hi an zawng.

Delhi sorkar hian bungalow pasarih a nei a, mahse hengah hian CM leh a deputy hi an awm duh lo.

Delhi Chief Minister hluite pawh khan CM bungalow atana dah, 33 Shamnath Margh a mi chu an luah duh ngai lo a ni. Sisodia pawhin CM hlui Sheila Dikshit-in a lo luah ṭhin, AB-17, Mathura Road-a sawn turin a phut bawk.

33, Shamnath March-a Delhi CM bungalow atana dah hi kum eng emaw chen aṭang khan 'anchhia' nia ngaih a ni ṭhin. Politician zingah he bungalow lo luah tawhte chuan harsatna an tawk nia sawi a ni a, an zingah hian CM hlui pahnih- Chaudhary Brahma Prakash leh Madan Lal Khurana te an tel a, an ni hian an term an hmang zo lo ve ve a ni. He bungalow luah hnuhnung ber chu Power Secretary hlui Shakti Srivastava a ni.

Delhi minister-te hi type 6 bungalow pek tur an ni a, mahse Kejriwal leh Sisodia hian type 7 bungalow pek an phut nia sawi a ni.