Sorkar laipuiin NEET leh JEE exam tlang tir a tum

National Eligibility cum Entrance Test (UG) leh Joint Entrance Examination (Main) exam neih hun sawn hla tura nawrna nasa tak a awm chungin sorkar laipui chuan exam hi ruahman lawk angin kaltlang pui a tum. 

Mi tam takin exam hun sawn hla turin sorkar laipui an ngen a, Supreme Court-ah hial pawh ngenna a lut a ni. Mahse sorkar chuan exam sawn hlat a tum lo a, exam centre siam belh a nih thu a sawi thung.  National Testing Agency (NTA) chuan examination centre hi siam belh a nih thu a tarlang a, a hma a JEE (Main) a examination centre awm zat 570 chu 660-ah tihpun a ni a, NEET-a examination centre 2,546 hi 3,843-ah tihpun a ni bawk. NEET (UG) exam hi September 13-a neih tur a ni a, JEE (Main) exam hi September 1-6 ah neih tum a ni.

Kum 17 mi climate activist Greta Thunberg chuan a twitter-ah NEET leh JEE exam ṭhulh turin PM Modi kaihhruai sorkar a ngen. Covid-19 hri len laia naupang exam luih tir chu thil dik a nih loh thu Greta chuan a sawi a, chhiatna thleng thei a nih vangin naupangte himna ngaihtuah a pawimawh thu a sawi bawk. 

NEET exam tuma zirlai in register hi nuai 8.58 an awm a, JEE exam tum zirlai register mi nuai 15.97 an awm bawk a ni. Heng zirlai tam zawkte hi Assam, Bihar, Gujarat, Chhattisgarh, Kerala, Karnataka, Madhya Pradesh, Odisha, Uttar Pradesh leh West Bengal state aṭanga exam pe tur an ni. 

NTA chuan exam hall-ah social distancing (midang hlata awm) ṭha taka kenkawh a nih tur thu a tarlang a, NEET exam centre-a room pakhata zirlai naupang ṭhu thei zat hi 24 aṭanga 12-a tihtlem a nih thu a tarlang bawk.

Room pakhata zirlai nuapang ṭhu thei zat 12-a tihtlem a nih chhan hi social distancing zawm tum a nih vang a ni. Social distancing hi exam hall bakah hall pawnah pawh ngaihpawimawh a nih tur thu NTA chuan a sawi. Exam tur zirlaite chu inven fimkhur dan turte hriattir an ni a, NTA chuan state sorkarte thlawpna an mamawh thu a tarlang.