LS-ah Land Act pharh a ni Eptute an chhuak tau

Nimina Lok Sabha rorel inkhawmah NDA sorkar chuan Land Acquisition Amendment Bill 2015 a pharh a, he­tih­lai hian eptute chuan bill siam danglam tumna hi duh loin House aṭangin an chhuak tau.

Eptute chuan sawisel hlawh tak, Land ordinance bakah sorkarin a dang panga pharh a tumte pawh Parliament-a a tlang an remti dawn lo tih an sawi.

Rural Development Minister Chaudhary Birender Singh chuan Land Acquisition, Rehabilitation and Resettlement (Amendment) Bill, 2015 hi a pharh a, sorkar laipui chuan he bill siam danglam a tum danah hian party hrang hrangte chu ṭumkhat dang sawiho pui a tum leh dawn tih a sawi bawk.

Eptu pawl hrang hrangte chuan sorkarin land bill siamṭhat a tum dan chu mipui leh loneitute tana ṭha lo, mi hausa leh thiltithei zawkte'n an hlawkpuina tur zawk a ni tiin an duh loh thu an lo sawi tawh a, sorkar chu a thu sut leh turin an phut. Congress hruai­tu Rajiv Shukla chuan sorkarin eptute thil phut hi a ngaihtuah loh chuan harsatna lian zawk a thlen phah a hlauhthawn thu a sawi.

Hetihlai hian Prime Minister Narendra Modi chuan land bill an siam danglam dan chu mi retheite tana ṭha tur zawk a ni tih sawiin, an thu hi sut an tum lo tih a sawi. Nimin tlai khan Modi chuan BJP MP leh an thawhpui party dangte chu meeting an neihpui a ni.

BJP chuan land acquisition bill siamṭhat a tum chungchangah hian loneitute ngaihdan leh rawtna neihte ngaihven turin member 8 awmna committee a din.