RSS hotu-in Mother Teresa a sawisel, eptute party ten an chhanglet

Rashtriya Swayamsevak Sangh (RSS) hotu, Mohan Bhagwat chuan nimina Bharatpur khuaa hun a hmanah Mother Teresa chu sawiselin, a thil tum ber chu mite Kristiana inlehtir a ni, a ti.

Bhagwat chuan Mother Teresa-in hmasial taka tum nei rana a thawhna chuan a thiltih ropui takte hlutna pawh a tinep vek tiin a sawi. "Hmasialna nei loa midang rawngbawlsak chu thil ṭha tak a ni. Mahse Mother Teresa kha chuan tum ruk a nei a, chu chu a thawhsakate Kristiana leh a ni. Midang­te tana thawka insawiin, an sakhua vawn a lehtir ṭhin a ni. Keini chuan chutiang rilru puin thil kan ti ve lo a ni," a ti.

Bharatpur-a hmei­chhia leh naupangte ṭan­puina tura NGO, Apna Ghar hmalakna, 'Mahila Sadan' leh 'Sishu Bal Grah' a hawnnaah Bhagwat hian he thu hi a sawichhuak a ni. Inkhawm buatsaiha tel ve, Border Security Force DGP hlui, Prakash Singh pawhin Mother Teresa a sawisel bawk.

Singh chuan, "Pawl dang tam tak, Mother Teresa aia thawk ṭha tak tak an awm a, mahse Kristiante chuan media puihna hmangin a hnathawhte chu nasa takin an puangzar zawk mai a ni," a ti. Hmarchhak biala a awm lai pawhin Roman Catholic-te'n tribal mite Kristian-a an inleh luihtir pawh a hmu tiin a sawi.

Mother Teresa-i pawl, 'Missionaries of Charity' hian ramchhung hmun hrang hrangah mi rethei, damlo leh chenna tur neilote ṭanpui hna a thawk ṭhin. A hnathawh ṭhat avang hian khawvel chawimawina sang, Nobel Prize pawh kum 2003 khan pek a lo ni tawh a ni.

Delhi Chief Minister Arvind Kejriwal chuan RSS hotu thusawi hi a chhanglet nghal a, "Kolkata-a Nirmal Hriday ashram-ah Mother Teresa bulah hian thla rei vak lo ka lo thawk ve tawh a, mi ropui taka ni. Khawngaih takin a ni hi chu bei tel suh u," tiin a twitter-ah a ziak.

Congress party pawhin Bhagwat-a thusawi hi sawi­selin, rorellai BJP chu thupha chawi turin a phut. Congress hruaitu Rajiv Shukla chuan, "BJP hian he thil avang hian thupha a chawi ngei tur a ni, hemi chungchang hi Parliament-ah pawh kan sawichhuak ngei ang. Mother Teresa hi hetianga sawichhiat mai tur a ni lo," a ti.

Trinamool Congress pawhin RSS hotu thusawi chu a dem takzet tih a sawi a, Mother Teresa chu mitinin an ngainat leh an hmangaih a ni tih sawiin, "Kolkata mi ka ni a, hei vang hian Bhagwat-a thusawi hi ka tan phei chuan hriat a nuam lo takzet a ni," a ti.

Missionariis of Charity thupuangtu, Sunita Kumar chuan Mother Teresa-in a lo zirtir angin, Bhagwat tan hian an ṭawngṭai sak dawn tih a sawi.