CBI-in NEET Exam paper leak vanga rinhlelh mi 13 man

Central Bureau of Investigation (CBI) chuan August 2, 2024, Ningani khan NEET-UG exam paper putrua inhnamhnawih ni ngeia hriat mi 13 te an man a, an hming pawh a puangzar nghal bawk.

CBI hian an mi rinhlelh 13-te hi CCTV, Artificial Intelligence technology, Forensic leh Location analysis hmanga chhui chian an nih hnuah an in hnamhnawih ngei tih hi finfiah a ni, a ti. Exam paper putru an chhuinaah hian inhnamhnawih nia rinhlelh mi 40 chuang man an ni tawh a, an zingah hian Bihar police 15 te pawh an tel a ni. CBI chuan hmun 58 ah he thubuai avanga inhnamhnawih te ngawrh taka chhui hna hi a thawk mek a ni.

Medical Entrance exam-a thil dik tawk lo theng vang hian FIR paruk theh luh a ni tawh bawk. Heng thubuai theh luhnate chu Bihar, Maharashtra, Gujarat leh Rajasthan-ah niin, exam laia entawn leh felhlel awm vang a ni. Thubuai theh luhte hi chhui chian mek zel a ni bawk.

NEET-UG exam hi NTA buatsaih niin MBBS, BDS, AYUSH-leh a kaihhnawih zirna peng hrang hrang, sorkar leh private zirna-ina admission hmuh theihna tur atana buatsaih a ni. Kumin May 5 khan khawpui 571-a centre 4,750 leh, rampawn hmun 14 ah candidate nuai 27 ten exam hi an hmachhawn a ni.