Lebanon buaina vangin Indian Embassy-in thuchhuah siam

Israel leh Lebanon helpawl, Hezbollah inkar boruak sosang zel avangin Lebanon-a Indian embassy chuan thuchhuah siamin, India mite chu fimkhur turin a chah.

Palestinian firfiak pawl, Hamas-ten October 7, 2023-a Israel an beih leh, hemi chhan letna atan Israel-in Hamas rorelna, Gaza Strip a beih hnuah, Hamas thlawptu Hezbollah leh Israel hi October 8 aṭang khan an ramriah an inbei zui ve nghal a ni. Tun thlengin buaina chhuak hian ziaawm lam a la pan thei lo a ni. Israel sipaite hian Israel ram luah, Golan Height-a ṭhalai 12 te thihna a mawhphurtu bera puh, Hezbollah military commander Fouad Shukur chu bitumin, tun hnaiah Shukur hi thah a ni tih pawh an puang chiang tawh bawk.

Lebanon khawpui, Beirut-a Indian embassy chuan X-ah, "Israel leh Hezbollah inkar buaina a sosan zel avangin, Lebanon leh a chheh velah thuthar awm leh hma chu zin emaw tlawh pawh emaw rih lo turin India mipuite ngen a ni" tiin, hei bakah Lebanon leh a chhehvela India mi khawsa mekte pawh insaseng vat turin thurawn an pe bawk a ni.

Indian Embassy chuan August 1, Nilainia Hamas hruaitu Ismail Haniyeh leh Hezbollah military commander Fouad Shukur te thah an nih avangin buaina sosang zel thei a ni a, hei vang hian India mipuite him zawk nana thuchhuah hi siam an nih thu an sawi.