Wayanad leimin : Chin hriat loa awmte zawng chhunzawm zel

Kerala-a Wayanad district-a leimin rapthlak tak thlen hnua chin hriat loha awm chu mi 206 an la tling a, heng mite zawn hna hi thawh chhunzawm zel a ni. Mahse dama hmuh beiseina a tlem tawh niin an sawi.

July 30, 2024 khan Wayanad district chhunga Mundakkai, Chooralmala, Punchirimattam leh Attamala khuaah chhiatna nasa tak hi a thleng a, nunna chan hi mi 219 an tling tawh a ni. Leiminin a hnawl leh chhilh nia hriat hi mi 206 an la tling a; Army, Navy, Air Force, NDRF, Kerala Police, Fire and Rescue Department bakah volunteer-ten chhanchhuah hna hi an thawk mek a ni.

Chhan chhuah hna thawh hi ui fing, radar, aerial survey drone leh scuba diver-ten an pui bawk.

Chief minister Pinarayi Vijayan chuan chin hriat loha awmte zawn hna chu a tawp lam an hnaih tawh tih sawiin, nungdama hmuh an beiseiawm tawh lo niin a sawi.

Chhiatna thleng vanga mi tam takin buaina an tawh mek laiin, ṭhenkhat chu volunteer anga inpein in chimah hian rangkachak, pawisa leh thil hlu dang ruk tuma lo zawng mek an awm nia sawi a ni a, hei vang hian state police-te pawh ngawrh takin an duty a ni. Thnuneitute chuan chhiatna thlenna hmunte hi mipui nawlpuiin an tlawh theih loh turin an dang a, volunteer-te pawh identity card pek vek an ni.