Madhya Pradesh-a temple bang chimah mi 9 an thi

Madhya Pradesh-a Sagar distict-ah August 4, 2024, Pathianni zing dar 10 khan Hardaul Baba temple bang chim vangin naupang pakua in nunna an chan a, mi dang eng emaw zat an hliam bawk. Hliam tuarte hi damdawi-in panpui nghal an ni.

Chhiatna thlen hnu hian lei laihna khawl leh a chhehvela khawtual mi leh police- ten thenfai hna an thawk nghal a ni.Chhiat tawhna hmun hi sorkar mi pawimawhte pawhin a hmunah an tlawh nghal bawk. Temple bang chim vanga thi naupang nunna chante hi kum 10-15 inkar niin an sawi.

Chief minsiter Mohan Yadav chuan chhiatna thlenga nunna chan chhungte a tuarpui thu leh, hliam tuarte pawh an dam leh thuai a duhsak thu a sawi. CM chuan thi chhungte hnenah sorkar chuan zangnadawmna, Rs nuai li ṭheuh a pek tur thu a sawi bawk.

Sagar district a chhiatna thlen hma ni hian, Rewa district-ah pawh in hungna bang chim avangin sikul naupang pali ten nunna an lo chan tawh bawk a, in neitu hi man nghal a ni.

Madhya Pradesh ah ruah a sur nasa hle a, ruah sur nasain state chhunga chhiatna a thlen vanga nunna chan hi 200 an tling tawh. Chenna in 206 luah tlak lohin a chhe bawk a, chhiatna tenau tuar mi 2,403 an awm tawh bawk.