Jharkhand aṭanga tui paih vangin Bengal-ah tui len hlauhthawnawm

West Bengal sorkar chuan Jharkhand dam pahnih aṭanga tui, cusecs nuai 1 vel paih chhuah a nih avangin an state hmun tam takah tuilian a thlen mai a hlauhthawnawm tih a sawi.

Bengal-ah hian ni eng emaw chen chu ruah nasa takin a sur tawh a, hei vang hian kawngpui tam tak tuiin a chim bakah, chenna in a chimte pawh a awm bawk. State chhung hmarlam, a bikin Coochbehar leh Alipurduar district-ahte tui len mai a hlauhawm avangin sorkar chuan warning a ti chhuak tawh.

State sorkar chuan Jharkhand aṭanga tui paihchhuah chungchangah state pahnih sorkar hian inbiakna an nei lo niin a sawi a, an ṭhenawm state tui paih avang hian state chhim lam dinhmun chu a hlauhthawnawm hle niin a sawi bawk. State khawpui, Kolkata-a Netaji Subhash Chandra Bose International Airport chu tuiin a chim nasa hle a, mahse flight erawh a buai phah lo thung. Bengal chhim lam district ṭhenkhatah ruahtui tla hi 150-200 mm te a tling.

Chief minister Mamata Banerjee chuan state chhung dinhmun a thlithlai reng a, senior official-te pawh biain, thil thlengte chu ngaihven reng turin a hriattir tih a chief advisor, Alapan Bandopadhyay chuan a sawi. CM hian district hrang hranga thuneitute pawh a be bawk a, thil thlen dan a hmuna en turin officer-te pawh tirhchhuah an ni tawh bawk.