Chhattisgarh-in rawng hmanga thingkung chei khap

Chattisgarh State Housing and Environment Department chuan sorkar pisa leh district pisa te chuan khawpui chei hna kalpuina atana rawng hmanga thingkung chei danglam ṭhin chu khap turin a hriattir. Dan zawm loa ti chhunzawm leh mawhphurtu nia hriat te chungah na taka hremna lekkawh turin thu a pe bawk.

Thing leh ramngaw humhalh kawnga thawktute chuan Chhattisgarh huam chhunga sorkar office leh private organisation ten khawpui chei nana an lo kalpui ṭhin, thingkung chei danglam chuan thingkung tana nghawng ṭha lo a neih avang leh a thih phah hial theih avangin tih chhunzawm tawh lo turin Department chuan a ti a ni.

Activist Nitin Singhvi-a'n Mahasamund district-a Special Area Development Authority (SADA)-in Sirpur Mahotsav-kût 2024 a hman denchhena kawngpui dung a thing awm 75 lai mai te rawnga an chei danglam chu ṭha ti loin State Chief Secretary hnenah a thlen a, Housing and Environment department hnenah thingkung chei danglam chu khap tura thu chhuah siam tir turin a thlen a ni.

Bastar University Professor, hnim leh thing lama thiamna bikna nei, Dr M L Nayak chuan rawng hnawih hian thing hawng pan leh te bik te tan ngawng ṭha lo tak a thlen theih thu a sawi. Pt Ravi Shankar University-a Raipur Chemistry Professor Dr Shams Parvez pawhin hetianga thing leh mau chei danglam hian rawnga chemical hlauhawm tak awm lead, cadium, mercury leh chemical hlauhawm dangte chuan thingkung tan hian thil pawi a thlen thei a, a nghawng neih hi scientific hmanga zirchianna neih ngei nise a duh thu a sawi bawk.