Lashkar-e-Taiba ten J&K-ah CRPF lambun

Lashkar-e-Taiba te chuan Inrinni khan Jammu and Kashmir-a Pampore-ah Central Reserve Police Force (CRPF) convoy beiin mi pariat an thih bakah mi 22 ten hliam an tuar.

He thil thleng hi tunhnai kum thum chhunga Jammu and Kashmir-a hel chetna thleng lian ber zingah ngaih a ni. He thil thleng hian sawi zui a hlawh hle a, Bus-ah hian mi 40 te chu venhimna awm loin an chuang a ni. Mi pahnih AK-47 leh hand grenade keng te chuan lo lambunin, thil thlenna hmunah hian AK-47 rifle, silaimu leh hand grenade paruk hmuh a ni a, hel te hian ruahmanna fel tak an nei sa nia rin a ni.

CRPF Director General Durga Prasad chuan, "CRPF te chuanna bus hi luh chilh an tum a, nimahsela kahhlum an ni ta a ni" a ti. Home Minister Rajnath Singh chuan, thil thleng chu pawi a tih thu sawiin, nunna chan chhungte a tuarpui thu a sawi a, hliam tuarte chu dam chhuak thuai turin duhsakna a hlan. He thil thlen dan chhui tur hian committee member pahnih awmna chu Pampore-ah hian tirh nghal a nih thu a sawi bawk.

Prime Minister Narendra Modi chuan "CRPF ten huaisen taka an beihletna chu a ropui hle a, ram leh hnam tana martar an ni" tiin Tweeter-ah a ziak. June thla chhungin Jammu-Srinagar Highway-ah hian inbeihna ṭum li a chhuak tawh a, sipai 17 thi tawhin hliam tuar ṭhahnem tak an awm bawk.

Official-in a tarlan dan chuan nikum aiin kuminah dan loa ramri kân an tam tih sawiin, hel 50 vel zet chuan ramri hi an kân tawh a, nikum kum tir lam thla li chhung khan hel ramri kân an awm hriat a ni lo thung.