Bihar class 12 Topper Ruby Rai man a ni

Bihar-a class 12 Arts stream-a Topper, Ruby Rai chu nimin khan Special Task Force te chuan an man a, a result cancel-sak nghal a ni.

Rai hi kum 17 mi niin, TV interview-ah political science subject chu eisiam lam zirna niin a sawi a, hei hian sawi zui a hlawh hle a, chhui zui a ni ta a ni. Rai hi Bihar School Examination Board expert committee hmaah a lo inlan tawh a, zawhnate a chhang thei lo a ni. Patna court chuan Rai lakah hian non-bailable warrant a tichhuak nghal a, topper dang pali te nen exam hmachhawn ṭha leh tura tih an ni. Ruby Rai hian nimin khan written test leh interview a hmachhawn leh nia hriat a ni. Amah bakah hian Science topper Saurbabh Shrestha, third topper Rahul Kumar leh Vishun Roy college Principal Bachha Rai fanu Shalini Rai te chu man an ni bawk. Science topper Srestha pawh hian TV-a interview-ah zawhna mawlmang te te a lo chang thei lo tawh a ni.

Bihar School Examination Board chairman Lalkeshwar Prasad chu tunhnai khan suspend a lo ni tawh a, heng zirlai topper te hnen aṭang hian cheng nuai 15 a dawng tih hriat chhuah a ni. Senior police officer Manu Maharaj chuan, Vikash Chandra hian zirlai fail te hnenah nuai 10 chawitirin pass certificate a pe chhuak a ni a ti. Heng bakah hian College affialliation dik lo taka pe chhuakah puh a ni bawk. He thubuai kal zelah hian Prasad bakah, a nupui Usha Sinha, Vishun Roy College principal Bachha Rai leh midang eng emaw zat an man tawh a ni.