Missile Technology Control Regime member thar India

India chu ram hrang 34 te awmna Missile Technology Control Regime (MTCR) member a ni ve ta. India-in Nuclear Suppliers Group (NSG) member ni tura a beihna chu hlawhtling rih lo mah se Missile Technology Control Regime (MTCR)-ah hian full member a ni thei ta a, hei hi kawng tam takah a
ṭangkaipui ngei beisei a ni.

Foreign Secretary S Jaishankar chuan MTCR ni tur hian France Ambassador-designate Alexandre Ziegler, Netherland Ambassador Alphonsus Stoelinga leh Luxembourg Charge d'Affaires Laure Huberty te hriatpuinain hming a ziak a ni.

External Affairs Ministry chuan thuchhuah siamin "India chu Missile Technology Control Regime (MTCR) member 35-na ni turin lakluh a ni ta a, hei hian international non-proliferation-ah nasa takin a pui thei dawn a ni" a ti. India hi nikum khan MTCR member ni tur hian pawm a ni a, tunah chuan full member atan lakluh a ni ta a ni.

Nuclear Suppliers Group (NSG) membr ni turin India chuan nasa takin bei mah se a ṭhenawm ram China leh NSG member ṭhenkhatten an dodal a ni. Kar kalta zirtawpni khan Seoul-ah NSG plenary meeting hi neih a ni a, he tih hunlai hian India hi MTCR a la ni lo.

India hian civil nuclear-ah US nen inremna eng emaw zat an siam a, nuclear, biological, chemical weapon leh technology lamah te huang zauh tumin NSG, MTCR, Australia Group leh Wassenaar Arrangement member nih tumin nasa takin a bei a ni. MTCR member a nih tak avang hian India chuan missile technology lamah huang a zauh sawt beisei a ni. Missile Technology Control Regime (MTCR) member ram te hian missile, rocket, air vehicle leh technology lamah te insumdawn tawnna an kalpui a ni.