Google CEO Sundar Pichai account hack a ni

India mi Google Chief executive officer Sundar Pichai Quora-a account chu hack a ni. A titute hi Facebook CEO Mark Zuckerberg-a Twitter account leh Pinterest account hack-tute tho kha nia rin a ni.

Hacker group tu tih hriat loh te chuan Facebook CEO Mark Zuckerberg-a Twitter leh Pinterest account te chu lo hack tawhin, tuna Pichai-a account hack-tu pawh hi he hacker group tho hi a nih rin a ni. Hacker group hi mi pathum an ni a, OurMine tia hriat an ni. Hacker te hian Pichai Quora account hi khawihin, thil chi hrang hrang an post a, a page leh Twitter account te hi a in link avangin hacker te hi engtiang chiahin nge an chet hriat theih a ni rih lo.

OurMine te hian Twitter-a Pichai follower eng emaw zat account an khawihsak bawk nia hriat a ni. OurMine te hian Twitter-ah "OurMine kan ni a, kan security te kan enchhin mek a ni, khawngaihin OurMine hi lo tlawh ve rawh" tih te an post a ni. OurMine te hian mi account password an thlak sak ngai lo nia hriat a ni a, a chhan pawh hacker dang ten an hack-sak ve leh chhawng thei niin an sawi.

OneMine te hian mi account pass-word maktaduai ruk vel lai an ruksak niin an sawi. Mi data pawimawh te an khawihsak ṭhin a ni.

Hetih lai hian OurMine te hian Facebook CEO Instagram account chu an khawisak lo niin an sawi. Facebook chuan thuchhuah siamin, Zuckerberg-a Instagram account chu khawih a nih loh thu an sawi ve bawk.