BJP-in Swamy hremna pe

Bharatiya Janata Party chuan Rajya Sabha MP Subramanian Swamy-an Twitter kal tlanga mi hrang a beih avang leh, mimal sawiselna a chhak chhuah fo avangin amah vauna a siam a, party thil tihnaa tel rih lo tura tih a nih bakah minister-te sawi chhe zawnga eng thu mah chhak chhuak lo tura tih a ni.

Subramanian Swamy hian tun hnai khan Reserve Bank of India governor thlaktu tur chungchangah a mimal ngaihdan sawi chhuakin, Raghuram Rajan chu na takin a bei. Rajan-a rilru put hmang chu a Indian lo a ni tiin a sawi a, he mi hnu lawk hian finance minister Arun Jaitley chu a bei zui bawk.

BJP hruaitu ṭhenkhat chuan mimal aiin party kalphung chu ngaih pawimawh zawk a ṭul thu an sawi a, Swamy chet dan chu party duh dan a nih loh thu an sawi. Subramanian Swamy hian Jaitley a beih avang hian finance minister hi a lawm lo hle a, a chungah party-in thuneihna lek tura a duh thu a sawi chhuak hial.

Party lam chuan Swamy do zawnga thusawi emaw ngaihdan lo sawi vak chu a rem lo tih sawiin, hruaitu lawkte aṭanga thupek a awm a nih loh chuan an tan tih theih a awm lo tih an sawi. Rajya Sabha MP chet dan hian sawi a hlawh hle a, party secretary Siddharth Nath Singh chuan Swamy lakah hian party discipline lek kawh a hun tawh hlea a hriat thu a lo sawi chhuak ve tawh bawk. BJP president Amit Shah leh PM Modi te chuan Swamy chungchang hi an sawi dun tawh nia tarlan a ni bawk.

Subramanian Swamy hi Pathianni-a party programmme Mumbai-a buatsaih leh RSS ten Chennai-a an buatsaihah te a tel ve phalsak a ni lo a, hei bakah hian sorkar bei tawh lo tur leh, minister te sawichhe zawnga ṭawng chhuak lo tura tih a ni.