Swathi thih danah police ten dem an hlawh

Kum 24-a upa Infosys-a hnathawk hmeichhia, S Swathi chu Zirtawpni khan railway station Chennai-ah thia chhar a ni a, a thih dan hian sawi zui a hlawh hle.

S Swathi hian a hnathawhna hmun pan turin rel a nghak a, station lun laiah hian thia hmuh a ni ta a ni. Darkar hnih chhung vel chu a ruang buaipui tur leh amah ngaihsaktu an awm loh avangin mak tih a hlawh hle.

Swathi pa Santhana Gopala Krishnan chuan, "Kan fanu hian ngaihsaktu a nei lo a, mi zik luai luaina karah hian darkar eng emaw zat chu a ruang hi tuma ngaihsak lohin a awm a ni. A ruang kan hmu leh thei hi kan lawm hle mai. Swathi hi mi ṭha tak a ni a, a taksa bung ṭhenkhat te hi mamawhtute tan kan hlan dawn a ni" a ti. A taksa bung ṭhenkhat midang tan hlan an duh chhan sawiin, "Swathi hi mi ṭha tak a nih avangin kan ui hle a, a taksa bung ṭhenkhat mamawhtute tana kan hlan hian kan kiangah a awm rengah kan ngai dawn a ni" a ti.

Police te chu Swathi thih hnu, darkar eng emaw zat liam hnuah a ruang awmna hi an thleng chauh nia sawi a ni.

Madras High Court chuan Thawhṭanni khan Chennai police te chu Swathi thattu chu ni hnih chhunga zawng chhuak turin thu a pe a, mahni hna hlen loh vanga he thihnaa mawhphurtu an awm a nih chuan hrem an nih tur thu a chhuah. Court chuan, police officer te chu khawiah nge an awm a zawt a, Swathi ruang chu mi zawng zawng hmuh theih turin rel station-ah a let reng a, darkar hnih chhung zet ngaihsaktu a nei lo a, hei hian India danpuiin a ram leilung fate tana a duan 'right to dignity' a bawhchhia a ni" a ti.

Police te hian Swathi chung-a thil thlen dan footage chu an ti chhuak a, Swathi that-tu station aṭanga a tlanchhe lai a lang a ni. Swathi pa San-thana Gopala Krishnan chuan,"Police teah hian mipuite chuan rinna kan nghat a, ka fanu thattu pawh hi an man chhuak ngei ngei turah ka ngai" a ti.