Union Cabinet-in 7th Pay Commission hman rawt

Union Cabinet chuan Seventh Pay Commission hmang turin ruahmanna a siam a, hei hi hman a nih chuan central government employees leh pensioner te a huam ang.

7th Pay Commission Pay scale hi hman a nih chuan India ramin sum kum khat chhunga a sum sen belh tur chu cheng vaibelchhe nuai 1.02 a ni a, hei hi India GDP aṭanga 0.7% vel ni tura ngaih a ni.

Cabinet Secretary PK Sinha kaihhruaiin Panel Committee din a ni a, an ni hian pay commission ruahmannate an zir chiang ang a, Finance Ministry-ah report a thehlut leh dawn a ni.

He hian central government employees nui 50 vel leh pensioner naui 58 vel a huam dawn a ni. 7th Pay Commission hi hman a nih chuan Central sokar hnathawk hlawh chu 23.55%-in a pun chhoh rin a ni a, hei hian allowance leh pension te a huam dawn a ni.

Kum khat chhunga hlawh atan luangral ṭhin vaibelchhe 1,02,100 chu vaibelchhe 39,100-ah a kai chho dawn a, allowance atan pawh vaibelche 29,300 vel sen belh a ngaih dawn bakah, pension hlawh atan sorkar chuan cheng vaibelchhe 33,700 a chawi belh dawn a ni. Hei hian general budget aṭangin vaibelchhe 73,650 vel a pawt hek dawn a, Railway budget aṭang pawhin vaibelchhe 28,450 vel chu ruahman ṭhen a ni.

6th Pay Commission hi kum 2008 aṭang khan hman ṭan a ni a, cabinet secretary leh an tlukpuite chuan thlakhatah Rs. 2,25,000 an hlawh a, hlawh sang ber an ni.

7th Pay Commission hi hman a nih chuan an hlawh hi Rs. 2,50,000-ah a kaichho dawn bakah central government hnuia thawk senior officer ṭhenkhatte chuan Member of Parliament te aiin an hlawh hnem zawk dawn a ni. Sorkar hna thawk hlawh tlem berte chuan thla khatah Rs. 18,000 an hlawh bawk ang.

Finance Minister Arun Jaitley chuan, ruahmanna hi siam a ni a, sorkar chuan chhiah tam zawk la turin hma a la mek a ni a ti. He tih lai hian expert-te chuan thil man nasa tak a san chho chuan mirethei zawk ten harsatna an tawk mai ang tih a hlauhawm niin an sawi ve bawk.