July 6 hmain Cabinet siksawi hman ring

Prime Minister Narendra Modi hoin nimin khan cabinet siksawi chungchangah council of minister te chuan meeting an nei a, minister te chuan kum hnih chhunga an hnathawh leh hmachhawp an neih mek te an sawi chhuah rin a ni.

Cabinet siksawi chhungchang hi PM Modi leh BJP president Amit Shah te chuan an lo sawi dun tawh a, thu chiang zawk hriat thuai beisei a ni. Prime Minister hian Africa zin tuma ruahmanna a siam mek avangin July 6 hmain Cabinet chu siksawi a nih rin a ni a, Minister thar an awm dawn niin a lang bawk. Minister of State Piyush Goyal leh Dharmendra Pradhan te chu cabinet rank pek an ni dawn nia sawi a awm a, Goyal hian hna pawimawh tak a chelh chhoh rin a ni. Sarabananda Sonowal chu Assam Chief Minister a nih tak avang leh Raosaheb Patil Danve chu Maharashtra state BJP president atan lakluh a nih tak avangin an hmun ruak luah turin tunge awm tih chu hriat a chakawm hle. Heng bakah hian Punjab, Uttarakhand leh Uttar Pradesh ten inthlan an hmachhawn dawn bawk avangin, Cabinet hi siksawi leh a la ngai dawn niin a lang bawk.

Law Minister Sadananda Gowda chu a hna chelh lai chan thei dinhmunah a ding mek nia sawi a ni. India ram hian Cabinet minister 83 kan nei thei a, tun dinhmunah Prime Minister telin 66 kan nei mek a ni. Mihring tamna Uttar Pradesh state chuan minister a ngah ber. Minister-ah mi 21 lakluh belh an ni dawn nia sawi a ni.