IS ten Hyderabad police station beih an tum

Islamic State mi nia rinhlelh mi pahnih te chuan Hyderabad police station bomb hmanga beih an tum nia thu a than avangin venhimna khuah zawka kenkawh nghal a ni. IS te hian police station bakah hian Bhagya Laxmi temple pawh a bitum tel dawn nia sawi a ni.

Mohammad Ibrahim Yazdani chuan Habeeb-a'n police station leh temple te beih nan hian bomb siamna hmanrua ala khawm lai leh a siam lai vel chu YouTube-ah a dah a ni. Habeeb hian sulphuric acid, acetone, hydrogen peroxide leh thil dang te chu Hyderabad leh Anantapur Andra Pradesh-ah te a lei nia hriat a ni. Habeeb leh Ibrahim te hi tunhnai khan Nanded, Maharashtra an pan a, semi automatic 9mm pistol an lei nia hriat a ni bawk. He mi hma hian an pahnih tho hian Ajmer, Rajasthan panin silai lei an tum a, pawisa Rs 75,000 vel chauh an neih avangin an hlawhchham nia sawi a ni. Silai bakah hian bomb kamna tur alarm clock an lei a, Saudi Arabia kal tumin visa an buaipui tih hriat a ni. India ramah hian Islamic State mi leh sa nia rinhleh mi 54 zet NIA leh states' force te chuan kum 2014 hnu lamah an man tawh a ni.