SC-in Delhi LG thuneihna a pawmpui

Supreme Court chuan nimin khan Delhi Lieutenant Govenor-in Municipal Corporation of Delhi-a mi 10 nominate tura a thuneihna chu a pawmpui a, Delhi sorkara council of minister-te thurawn leh duh danin a phuar kher lo tih a sawi.

He thutlukna hi justice Ps Narasimha leh Sanjay Kumar awmna bench in a siam a ni. LG hian Delhi Municipal Corporation Act 1957-a Section 3(3)(b)(1) hnuaiah he thuneihna hi a nei a ni, a ti. LG hnena expert 10 nominate tura thuneihna pekna tur hian kum 1993 khan Act hi siamṭhat a ni.

Bench hian Delhi-a sorkar aiawh inlan, senior advocate AM Shingvi-a'n LG thuneihna pek dan chu thil awmze nei lo leh, tunlai huna hman chi ni tawh lo nia a sawina chu a pawmpui lo a ni. Singhvi hian India ram khawpuiah hian mipui thlan sorkar a ding tawh a, mipuiten an aiawh tura an thlan chhuah sorkar hian LG office lam inrawlh loin municipal inrelbawlna pawh a kut ken tawh tur a ni, a ti. Mahse, court chuan, 'He dan hi Parliament siam a ni a, he dan hian LG chu a thuneihna hmang thei turin a ti a ni," a ti thung.

Supreme Court-in thutlukna a siam tak avangin, Delhi sorkar pawmpuina tel kher loin LG hian Municipal Corporation of Delhi-ah aldermen 10 a ruat thei ang.

Delhi-a AAP sorkar chuan LG hian sorkar lam remtihna tel loin alderman hi a ruat tiin Supreme Court-ah petition a thehlut a ni. Petition-ah hian President-in Council of minister-te rawtna anga Parliament member a ruat dan ang hian, Delhi LG pawhin Municipal member tur a ruat dawn hian Delhi minister-te thurawn a zawm ve tur a ni, an ti. Hemi chungchang hi court chuan thla 15 dawn a ngaihtuah avangin MCD hian standing committee pawh a din theih loh phah a ni. Mahse court chuan nimin khan thutlukna hi a siam ta a, Delhi sorkar duh dan chu a hnawlsak ta zawk a ni.