Wayanad leimin : Chin hriat lohin 180 an la lawm

Kerala-a Wayanad district-a leiminin a chhilh leh a hnawlte zawn hna chu nimin khan hmun hrang hrangah thawh chhunzawm zel a ni a, nimin tlai thleng khan chin hriat lohin mi 180 an la awm.

Leiminna hmun, zone parukah chhanchhuah hna hi Army, Navy, forest, K-9 Dog Squad, NDRF leh police official-ten an thawk a, tualchhung miten an pui bawk. Chhanchhuah hna thawktu hi mi 1,500 chuang an tling. Wayanad, Malappuram leh Kozhikode district-a luang tlang, Chaliyar lui-ah pawh ruang zawn hna hi thawh a ni bawk.

State revenue minister K Rajan chuan ruang hmuh, tunge an ni tih hriat loh mi 31 leh taksa bung hrang an chhar 158-te chu Puthumala-ah phum an ni dawn tih a sawi. Pathianni khan ruang chhar zinga pariat, tunge an ni tih hriat loh chu phum an lo ni tawh bawk a ni.

Ruahsur nasa vanga Wayanad district-a kar khat chhung sikul khar a nih hnuah nimin khan zirna in te pawh an kal leh ṭan. Hetih lai hian leimin tuarte awmna tura relief camp atana hman sikul ṭhenkhat erawh chu khar chhunzawm an la ni thung.