Air Force-in Astra missile 200 siam phalsak

Indian Air Force (IAF) chuan Defence Research and Development Organisation (DRDO) leh Bharat Dynamics Limited (BDL) te hnenah Su-30 leh LCA Tejas fighter thlawhtheihnaa hman tur air-to-air missiles, Astra missiles 200 siam a phalsak.

Missiles siam chhuah phalna hi DRDO leh public sector firm BDL hnenah an pek chhuah tawh thu hi IAF Deputy Chief Air Marshal Ashutosh Dixit-chuan tun hnaia Hyderabad a tlawh ṭumin a sawi.

Astra Programe hnuaiah air-to-air missiles siam hna hi kalpui a ni a, hei hi Indian Armed Force-te van boruaka indona kawnga an thahrui tih chakna tur atan duan a ni. Astra mark 2 an siam hma hian Mark 1 chu hman theih a siam chhuah lo ni tawh a, kilometer 100 laia hla kap pha a ni a, IAF leh Navy-te hman turin pek an ni tawh bawk.

Senior defence official-in an sawi danin, Mark 2 missile-hi a hmaa lo siam tawh Mark 1 aia ṭha leh changkang zawk tura duan a ni a, enchhinnaah pawh km 130 laia hla kap thei a nih bakah, a ai hla pawh kap thei tura beisei a ni bawk a, thla rei lote hnuah enchhin theih a rinawm thu a sawi.

Ramchhung thiamna leh kutkawih hmanga air-to-air missile leh ralthuam dang siam hna hi kum 2001 aṭang daih tawh khan bul ṭan alo ni tawh a, DRDO leh an thawhpui hrang hrang ten an duang ṭhin. Missile chak leh ṭha zawk, mit in a hmuh phak loh thleng pawha kap thei duan chhuaha ralthuamte tih chak chu an tum ber a ni.

Hyderabad-a Defence Research and Development Laboratory (DRDL) chu ralthuam lian tham siam chhuahna tura tih niin, hna pawimawh leh zirchian hmasak ngaite zirchianga mumal taka hma a sawn theihna turin task force pawh din a ni bawk.