Shiv Sena-te'n Mother Teresa chungchangah RSS hotu thlawp

Rashtriya Swayamsevak Sangh (RSS) hotu Mohan Bhagwat-a'n Mother Teresa sawisel a, a thil tum ber chu mite Kristiana inlehtir a ni tia a sawi chu eptu pawl leh mi ṭhenkhatin na takin an sawi­sel a, hetihlai hian Shiv Sena chuan RSS hotu hi an thlawp tih an sawi.

Nimina Shiv Sena chanchinbu, Saamna tihchhuahah Bhagwat-a thusawi an thlawp thu hi tarlangin, Kristian missionary-te chuan ram hrang hrangah centre an hawng a, an hawn chhan ber chu Kristian sakhua chawilar a, an sakhua zawm tura midangte hruai­luh a ni, a ti. Bhagwat chu thudik a puanchhuah avanga a fak thu an tarlang bawk.

Shiv Sena chuan, "Muslim-te chuan ngun­hnam hmangin an sa­khuaa an inleh luihtir a, Kristiante chuan sum leh ṭanpui hna thawh hmangin Kristian-ah an inlehtir thung a ni," a ti.

Missionary-te hna­thawh dan dik tak a sawichhuah avangin Bhagwat chuan ram tan thil ṭha tak a ti a ni tiin Sena chuan, "Mother Teresa hnathawhte kha kan ngaihlu a, vantlang rawngbawltute pawhin hetiang hna hi an lo thawk tawh ṭhin. Mahse heng mite hian sakhua inleh hi an ti ve lo," tiin a tarlang.

VHP-in Hindu sakhua zawm leh beihpui a thlak, 'ghar wapasi' campaign a kalpui mek pawh RSS hotu thusawi chuan a tihchak phah sawt dawn tiin Sena chuan a sawi.

RSS hotuin Mother Teresa chungchang a sawichhuah hma, Thawhlehni khan BJP hruaitu Meenakshi Lekhi chuan Mother Teresa hian a interview-naah hna chu Kristian sakhuaa midangte hruai luh a nih thu a lo sawi ngei tawh a ni, a ti. Lekhi chuan Mother Teresa khan, "Mi tam takin social worker angin an ngai a, mahse Isua rawngbawltu ka ni a, ka hna chu Kristian sakhua thehdarh a, midangte hruai luh a ni," tiin a sawi tawh a ni, a ti.