TADA court-in damchhung tang turin Abu Salem a hrem

Gangster Abu Salem chu kum 1995-a Mumbai-a in sak hna thawktu Pradeep Jain thahna thubuaiah thiam loh chantir a nih hnuin, special TADA court chuan nimin khan damchhung tang turin a hrem.

Special public prosecutor Ujjwal Nikam chuan a tirah chuan a pawikhawihna avang hian Abu Salem hi thi tura hremna pek a phut a, a hnuah dam­­chhung tantir turin a thil phut hi a thlak leh a ni.

Court chuan Salem-a driver Mehndi Hassan pawh damchhung tang turin a hrem bawk.

Salem-a ukil, Sudeep Passbola chuan court thutlukna hi chhangletin, tualthahna thlen chhan chu inphiarrukna vang a ni a, a tira ruahman lawk pawh a ni lo tih a sawi. Hei bakah hian kum 2005-a Portugal aṭang India rama Abu Salem lakluh a nih dawn khan Portugal sorkar hnenah inremna an siam bawhchhe lo turin sorkar chu a intiam a ni, a ti. Portugal leh India-in inremna an siamah chuan Salem hi thi tura hremna emaw, kum 25 aia rei emaw tantir lo tura tih a ni.

Kum 47 mi, Salem hi Taloja Central Jail-ah a tang mek a ni.

Police-te an tarlan dan­in, kum 1995 March 7 khan Jain hian a ram ṭhenkhat chu Salem hnenah a pek duh loh avangin Mumbai-a Juhu bungalow pawnah kahhlum a ni. February 16 khan special TADA court chuan Salem leh a thurualpui- Mehndi Hasan leh Virendra Jhamb-te chu Jain-a thah a nih thubuaiah hian thiam loh a lo chantir tawh a ni.