H1N1 hri leng do let turin sorkarin theihtawp a chhuah

Union Health Minister JP Nadda chuan ramchhunga hri leng mek, swine flu H1N1 hri do letin sorkar chuan theih­tawp a chhuah mek tih a sawi a, damdawi pawh mamawh zat a awm reng a ni, a ti.

Minister chuan thil awmdan chu sorkar laipuiin ngun takin a thli­thlai reng a, state hrang hrangte pawh a ṭul ang­in a pui zel tih a sawi. Mipuite chu hri leng laka fimkhur turin a chah a, hemi rual hian mipuite chu chiai lo turin a chah nghal bawk.

Record thar berah chuan swine flu vanga thi hi mi 875 an tling tawh a, hri vei hmuhchhuah tawh mi 14,000 chuang an awm tawh bawk.

Nadda chuan damdawi a tam tawk a, sorkar hospital-ahte a thlawna swine flu test-na tur pawh pek an ni tih a sawi.

Hri leng danna, vaccine chuan za-ah zain a veng him lo nia mithiam­te chuan an ngaih thu minister chuan a sawi a, eng ang takin nge hri danna hian a thawh tih chu zawhna pawh a awm thu a tarlang bawk.

State hrang hrang leh hospital-ahte swine flu veite enkawlna tur bik, isolation ward siam ve tur hriattir an ni a, dcotor-te training pe tur te, personal protect equipment-te pe tura hriattir vek an nih thu minister chuan a sawi.