Congress-in Land Ordinance duh lohin nawrh a huaihawt

NDA sorkarin Land Acquisition bill siamṭhat a tum dan chu duhloin nimin khan Congress party-in New Delhi-a Jantar Mantar-ah nawrh an huaihawt.

Congress party chuan an nawrh huaihawt hi 'Zameen Wapsi Andolan' tiin an vuah a, an party hruaitute pawh an tel. Nimina nawrh huaihawtnaah hian party president Sonia Gandhi, political secretary Ahmed Patel, AICC general secretary- Digvijay Singh, Madhusoodhan Mistry, Ajay Maken bakah Rural Development Minister hlui Jairam Ramesh, Salman Khurshid, Jitender Singh, Raj Babbar, Deepinder Hooda, leh Sushmita Deb-te'n an telpui.

Thuchhuah an siamah Congress party chuan, "BJP sorkarin Congress sorkar laia lo pass tawh, Right to Fair Compensation and Transparency in Land Acquisition, Rehabilitation and Resettlement Act 2013 thlak danglama dan sakei siam a tum hi kan duh lo takzet a ni," tiin, he dan siam dang­lam tum dan hi mi rethei leh loneitute ngaihthah a, mi hausa leh thiltithei zawkte tlawnna a ni, a ti.

Congress party chuan ramchhunga hmun hrang hrang loneitute chu sorkarin anmahni ngaihthah zawnga sorkarin dan siam danglam a tumna chu an duhlohna lantir turin a ti bawk.

Eirukna dotu, social activist Anna Hazare pawhin sorkarin Land Acquisition siamṭhat a tum dan hi duhloin, ni hnih chhung nawrh a lo huaihawt tawh bawk.