BJP thawhpuite'n land ordinance an dodal

BJP kaihhruai National Democratic Alliance (NDA) sorkarin land acquistion bill siamṭhat a tumna chu eptu pawl hrang hrangte'n nasa taka sawiselin an dodal a, eptu party-te bakah NDA hnuaia BJP thawhpui party dangte pawhin land ordinance hi an sawisel.

BJP thawhpui hrang hrang, Maharashtra-a Shiv Sena, Punjab-a Akali Dal leh Bihar-a LJP-te chuan land ordinance chu an sawisel a, Shiv Sena chuan, "Loneitute tihchhiat tumna, dan sakei siam tum chu kan dodal tlat dawn a ni," a ti.

Shiv Sena hruaitu, Su­bhash Desai chuan NDA sorkarin land acquisition bill siamṭhat a tum danin lo­­neitute laka nghawng ṭha lo a neih theih dante chu sawi­chhuah zel an tum thu a tar­lang. Maharashtra-a BJP-Sena ṭangrual sorkara industries minister Desai chuan, "Sorkar laipui chuan thutlukna pawimawh a siam dawnin midangte thu a ngaihchan a ngai a ni. Hemi chungchangah hian Sena chuan a ngaihdan hi a thlak danglam dawn lo," tiin a sawi.

Akali Dal pawhin lonei­tute ram zau tak tak hmansak leh laksak an nih dan tur chungchangah sorkar laipui ngaihdan chu an ṭawmpui thei lo tih an sawi a, ram lak a nih hmain a ram neitu, loneitu tam zawk remtihna lak chu a duhdan a ni, a ti.

Ram Vilas Paswan-a party, LJP chuan dan siamṭhat a tum danah sorkar laipui chu insawifiah turin a phut a, ram laksak neitu, loneitute hnena zângnadawmna pek tur chhut danah thil hriatthiam har tak a awm thu sawiin, "A rate pangngai bakah sorkar rate hran a awm a, a eng zawk nge hman tur tih pawh sawichian a ni lo," a ti.