Eptute'n minister bang tura phut vangin LS inkhawm titawp

Nimina Lok Sabha rorel inkhawmah eptute chuan Parliamentary Affairs Minister M Venkaiah Naidu chu bang turin an phut a, member-te hi an in aubuai avangin chawhma dar 11.30 thleng khan rorel inkhawm hi titawp a ngaih phah a ni.

Naidu hian Parliament budget session ṭanni-a Congress hruaitu, Rahul Gandhi a telloh chungchang chu na takin a lo sawi zui tawh a, Congress party chuan a che thei tawh lo a nih chuan hmun hla taka kal mai turin a ti. A party chu centre-ah kum nga chhung a lal dawn a ni tih sawiin, sorkar chuan ordinance siam chu a duh loh tih a sawi a, Congress chu a sorkar laia ordinance tam tak siamah a puh. Naidu chuan kum 62 chhungin Congress chuan ordinance 637 a siam a, United Front sorkar pawhin 77 a siam a ni, a ti.

Congress hruaitu, Mal­likarjun Kharge chuan, "Minister hian a dinhmun sawhnghet leh sawifiah turin dikna a nei a, mahse midangte deu sawh turin dikna a nei lo. Hetianga indeusawhna hi kan ngaidam mai dawn lo," a ti.

Eptu pawlte chuan minister hi ngaihdam dil turin an phut a, hetihlai hian Naidu chuan, "Political party hrang hrang member-te hi ka zah em em a, ka thusawi kha an ngai kawi mai a ni," tiin a sawi.