Hri kai hmuh chhuah thar 75,000 chuang awm Covid-19 vanga thi sing ruk chuang tawh

Ram chhunga hripui lengin ziaawm lam a pan thei lo a, nimina Ministry of Health and Family Welfare report tihchhuahah phei chuan a ṭum khatna atan ni khatah hri kai hmuh chhuah thar sing sarih chuang an awm a, hei hi hri kai hmuh chhuah tam ber ni ni lehin hmuh chhuah thar zat punna hi a tam hle.

Nimina hri kai hmuh chhuah thar zat hi 75,760 a ni a, hei nen hian nimin thleng khan ram chhung hmun hrang hrangah hri kai hmuh chhuah 33,10,234 an awm tawh. Darkar 24 chhunga dama puan mi 56,013 awm lehin hri kai dam leh tawh 25,23,771 an awm tawh. Thihpui 1,023 an awm belh avangin Covid-19 vanga thi 60,472 an awm tawh a, hri kai mek 7,25,991 an la awm bawk. 

Enkawl dam tawh rate hi 76.24% a ni a, thihpui rate chu 1.83% a ni thung. Hri kai mek zinga 0.29% chu ventilator hmanga enkawl an ni a, ICU-ah 2% an awm bawk niin Health Ministry chuan a tarlang. 

Oxford COVID-19 vaccine mihringa enchhinna thawh hnihna chu Nilaini khan ṭan a ni. Pune-a hmunpui nei Serum Institute of India (SII) siam damdawi hi Bharti Vidyapeeth Medical College and Hospital-ah enchhinna neih a ni tih damdawi-in official pakhat chuan a sawi a, enchhinna atan hian mipa pahnih an inpe a ni.

Minister of State (MoS) for Social Justice and Empowerment, Krishan Pal Gurjar chuan hripui a kai tih hmuh chhuah a ni. MoS hian Twitter kaltlangin hri a kai ngei a ni tih hi tarlangin amah nena contact neite chu test paltlang ngei turin a ngen a, doctor-te thurawn angin enkawl nghal a nih dawn thu a tarlang bawk.

Politician langsar tak tak zingah hripui kai an awm nual tawh a, chung zingah chuan Union home minister Amit Shah pawh a tel a, Karnataka Chief Minister B S Yediyurappa leh Congress MP Karti Chidambaram-te pawhin Covid-19 hi an kai tawh bawk a ni. Kartirah khan Haryana chief minister ML Khattar pawh hripui a kai vangin Gurgaon-ah enkawl a nih thu tarlan a ni bawk.

State/UT zinga hri kai nuai thum chuang awmna pali a awm ta a, nimina MoHFW report tihchhuahah Karanataka-ah pawh hri kai hi nuai thum chuang an awm ve leh ta a ni.

Karnataka-ah hian hri kai hmuh chhuah thar 8,580 lai an awm leh a, hemi a nih avang hian hri kai 3,00,406 an awm ta a ni. Enkawl dam pawh an tam tawh hle a, 2,11,688 lai chu an dam leh tawh a, 5,091-in an thihpui tawh a, hri kai mek 83,627 an la awm thung.

Nimina sorkar report tihchhuahah khan Uttar Pradesh-ah hri kai hmuh chhuah thar 5,640 lai an awm leh bawk a, UP-ah hian nimin thleng khan hri kai hmuh chhuah     2,03,028 an awm tawh bawk. Hri kai tamna ber Maharashtra-ah chuan nimin thleng khan mi 7,18,711-in hri an kai tawh a, Tamil Nadu-ah nuai 3.9 chuang awm tawhin Andhra Pradesh-ah pawh nuai 3.8 chuang an awm tawh bawk a ni. 

Indian Council of Medical Research (ICMR) chuan nimina report an tihchhuahah Covid-19 sample 9,24,998 an endik leh tih tarlangin nimin thleng khan sample 3,85,76,510 an endik tawh. ICMR hian Covid-19 sample endikna atana laboratory pawmpui hi 1550 an nei tawh a, heng zinga 993 hi sorkar laboratory niin 557 chu private laboratort a ni thung.