Uttarakhand-ah ruah leh rial avangin mi sawm an thi

Nimin zing khan chhum rial leh ruah pai chuan na takin Uttarakhand-a Singhali leh a cheh vel a nui a, mi 10 an thi bakah, chin hriat lohin mi 25 an awm a, in eng emaw zat a tih chhiain mi tam tak chuan an chenna hmun an chhuah san.

Pithoragarh district magistrate HC Semwal chuan, Singhali-ah hian ruang panga hmuh a ni tawh a, Thal khua-ah ruang pathum hmuh a ni tawh a ni a ti. Chhanchhuah hna thawktute chuan mi zawn hna leh chhan chhuah hna an thawk nghal a, army leh paramilitary-te chuan an pui ve bawk.

Darkar hnih chhungin ruah 100mm a tla hman a, square kilometre 50 huam chhunga chengte nun phung a khaihlak nasa hle. Mi 25 an chin hriat loha awm te hi thingtlang khua pasarih a mi te an ni a, bo zawn hna hi Indo Tibetan Border Police Force, Sashastra Seema Bal leh Pithoragarh district police te chuan an thawk nghal a ni.

Disaster management office chuan, chhum rial leh ruah pai hian Singhali, Patthakot, Ogla leh Thal khua te a nuai a, mi tam tak an bo bakah nunna chan an awm nual tih a a tarlang ve bawk.