CM pasarihin NEET leh JEE exam sawn hla turin ngen dawn
BJP sorkarna state ni lo, state pasariha chief minister-te chuan Supreme Court-ah NEET (UG) leh JEE (Main) exam sawn hla tura ngenna an thlen dawn.
Exam sawn hla tura ngenna an siam tum chhan hi ramchhunga Covid-19 hri lengin ziaawm lam a la pan mai loh vang a ni. Exam chungchangah hian Congress hotu lailawk Sonia Gandhi hoa meeting neih a ni a, he hunah hian West Bengal CM Mamata Banerjee (TMC), Maharashtra CM Uddhav Thackeray, Punjab CM Amarinder Singh (Congress), Jharkhand CM Hemant Soren (JMM), Rajasthan CM Ashok Gehlot (Congress), Chhattisgarh CM Bhupesh Baghel (Congress) leh Puducherry CM V Narayanasamy (Congress)-te an tel a ni.
Anni ho hian SC-a NEET leh JEE exam sawn hla tura ngenna siam chu an rem ti zui ta a ni. Exam sawn hlat chungchangah hian zirlaite chu an hriselna dinhmun chu hlauhthawn awma a awm theih thu an tarlang a, zirlai tam zawk chuan exam hi sawn hlat an duh bawk. Vawiin aṭangin state-ah chuan sorkar laipui office kawtah leh district headquaters-ahte Congress chuan exam sawn hla tura ngenna chu lantir an tum. August 17 khan SC chuan NEET (UG) leh JEE (Main) exam sawn hla tura ngenna thehluh chu ngaihtuahin a lo hnawlsak tawh a ni.